Is-sena l-oħra Birżebbuġa fakkret l-ewwel ċentinarju minn meta saret parroċċa nhar id-9 ta' Settembru tal-1913. Min qara l-informazzjoni storika li nkitbet is-sena l-oħra jaf li l-popolazzjoni ta' Birżebbuġa litteralment splodiet fl-ewwel ħames snin minħabba l-iżvilupp industrijali li seħħ permezz tal-ftuħ tal-impjant għall-ħażna tat-Torpedos mill-RNAS f'Kalafrana, il-ftuħ tal-impjant tal-ħażna taż-żjut u l-bini tal-mitjar ta' Ħal Far mill-RAF. Dan kollu wassal sabiex diversi nies jiġu joqgħodu f'Birżebbuġa bil-għan li jkunu qrib il-post tax-xogħol tagħhom peress li t-trasport ma kienx bħal tal-lum. Din is-sena jaħbat għeluq il-100 sena minn meta l-kumpanija Shell fetħet l-impjant tagħha f'Birżebbuġa. F'din il-kitba ser naraw r-rabta li kellha din il-kumpanija ma' Birżebbuġa tul is-snin. ; N/A